Контрактнинг 25 ёки 50 фоизи: талабалар қачонгача тўлаши керак?
Шунингдек, кундузги бакалавриатда ўқиётган педагоглар фарзандлари контракт суммасининг 30 фоизини қоплаб бериш учун ариза топшириши мумкин.
2026/2027-ўқув йили учун олий таълим ташкилотларида контракт тўловларини амалга ошириш ҳамда талабалар сафига қабул қилишни расмийлаштириш муддати 1 ноябрга қадар узайтирилди. Бу ҳақда Таълим ва илм-фан вазирлиги хабар берди.
Мазкур муддат бакалавриат ва магистратурага ўқишга тавсия этилган абитуриентлар, ўқиши кўчирилган ёки кўчириб тикланган, шунингдек, ўқишга қайта тикланган талабаларга тааллуқли.
Белгиланган муддатгача базавий тўлов-контракт бўйича йиллик сумманинг камида 25 фоизи, табақалаштирилган тўлов-контракт бўйича эса камида 50 фоизи тўланиши лозим.
Педагоглар фарзандлари учун 30 фоизлик имтиёз
2026/2027-ўқув йилидан бошлаб давлат олий таълим ташкилотларининг бакалавриат босқичида кундузги таълим шаклида таҳсил олаётган педагог ходимларнинг фарзандлари учун контракт суммасининг 30 фоизини қоплаб бериш тартиби жорий этилган.
Мазкур имтиёздан фойдаланиш учун kontrakt.edu.uz платформаси орқали ариза юбориш керак.
