Исроил 2023 йилдан бери 2 мингдан ортиқ фаластинлик болани ҳибсга олди — ҳисобот
Фаластинлик маҳбуслар жамияти болаларга нисбатан қийноқлар, очлик ва тиббий ёрдамдан маҳрум қилиш ҳолатлари кузатилаётганини билдирди.
Исроил қамоқхоналарида ҳозирда камида 350 нафар фаластинлик бола сақланмоқда. Фаластинлик маҳбуслар жамияти уларнинг оғир шароитларда сақланаётгани, қийноқлар ва тиббий ёрдамдан маҳрум қилиш ҳолатлари кузатилаётганини билдирди.
Ташкилотнинг чоршанба куни эълон қилинган ҳисоботига кўра, Исроил кучлари 2023 йил октябридан буён 2 мингдан ортиқ фаластинлик болани ҳибсга олган. Ҳисоботда Исроил расмийлари фаластинлик болаларни нишонга олишни кучайтираётгани таъкидланган.
Маълумотларга кўра, сешанба куни босиб олинган Ғарбий Соҳилнинг Хеврон шаҳрида камида олти нафар бола ҳибсга олинган. Ғазо секторида ҳибсга олинган болаларнинг аниқ сони эса номаълум. Ташкилот буни минглаб одамларнинг, жумладан, болаларнинг бедарак йўқолгани ва мажбурий равишда ғойиб қилиниши билан изоҳлаган.
Ҳисоботда айблов эълон қилмасдан ва озод этилиш санасини белгиламасдан ҳибсда сақлаш болаларни оилавий ҳаёт ҳамда таълимдаги барқарорликдан маҳрум этаётгани қайд этилган.
Қамоқхоналардаги болаларнинг аҳволи
Ташкилот Исроил қамоқхоналарида қўрқитиш, қийноқлар, очлик ва тиббий ёрдам кўрсатмаслик ҳолатлари кузатилаётганини билдирган. Ҳисоботда 15 ёшли Муҳаммад Ҳамиднинг иши келтирилган. У Офер қамоқхонасида сақланаётганида қўтир касаллигини юқтириб олган. Кейинчалик унда оғир инфекциялар ривожланган, юрак операциясини бошдан кечирган ва оғир аҳволда реанимацияга ётқизилган. Шундан сўнг унинг бир оёғи ампутация қилинган.
Шунингдек, 17 ёшли Валид Аҳмад 2025 йил март ойида Мегиддо қамоқхонасида олти ой сақланганидан кейин вафот этгани қайд этилган. Ўша йилнинг декабрида Исроил судьяси унинг ўлими юзасидан терговни тўхтатган. Судья очликдан азият чекканига оид далиллар борлигини, бироқ ўлимнинг аниқ сабаби узил-кесил аниқланмаганини билдирган.
Исроил қамоқхоналарида америкалик ўсмирлар ҳам сақланмоқда
Ҳисоботда Исроил қамоқхоналарида айбловсиз сақланган АҚШ фуқароси бўлган ўсмирлар ҳақида ҳам маълумот берилган. Валид Аҳмад билан бирга Мегиддо қамоқхонасида сақланган, Флоридада яшовчи Муҳаммад Иброҳим АҚШдаги ташкилотлар ва юқори мартабали қонунчиларнинг саъй-ҳаракатларидан сўнг озод қилинган.
Яна бир америкалик ўсмир Абдулкарийм Исо Аҳмад Сафий июнь ойида Ғарбий Соҳилдаги уйидан тунги рейд вақтида олиб кетилган. У ҳибсда 18 ёшга тўлганидан кейин Офер қамоқхонасининг вояга етганлар сақланадиган бўлимига ўтказилган.
Июль ойида эса 16 ёшли америкалик Адам Важеҳ Абдулфаттоҳ Каракраҳ ҳибсга олинган. Унинг оиласи гаров пули тўлаганидан кейин ўсмир август ойида озод этилиши кутилган, бироқ Исроил расмийлари қарорни кутилмаганда бекор қилган.
Фаластинлик маҳбуслар жамияти халқаро ҳамжамиятни ўзбошимчалик билан ҳибсга олинган болаларни озод қилиш, ҳуқуқбузарликлар юзасидан тергов ўтказиш ҳамда қийноқлар, очлик ва тиббий ёрдамдан маҳрум қилиш ҳолатларига чек қўйиш учун амалий чоралар кўришга чақирган.
Al Jazeera маълумотига кўра, Исроил 2023 йил октябрида бошланган урушдан бери Ғарбий Соҳилда 25 мингдан ортиқ фаластинликни, Ғазо секторида эса яна минглаб кишини ҳибсга олган.
