“Яшашда давом этишингиз керак”: Жанубий Корея президенти фуқароларга мурожаат қилди
Мамлакат 2030 йилгача ўз жонига қасд қилиш даражасини пасайтирмоқчи.
Жанубий Корея президенти Ли Чже Мён фуқароларни қандай вазиятга тушишидан қатъи назар, ҳаётдан воз кечмасликка ва қийинчиликларга дуч келганда мутахассислардан ёрдам сўрашга чақирди. У бу ҳақда Х ижтимоий тармоғида мамлакатда ўз жонига қасд қилиш кўрсаткичлари пасайгани ҳақидаги хабарларга муносабат билдириб ёзди.
“Яшашингиз керак. Нима бўлишидан қатъи назар, яшашда давом этишингиз керак”, — деб ёзган президент. Унинг таъкидлашича, мутахассислар қийин вазиятдан чиқиш йўлини топишга ёрдам бериши мумкин.
Расмий статистика маълумотларига кўра, 2025 йилда Жанубий Кореяда ўз жонига қасд қилиш оқибатида 14 144 киши вафот этган. Ҳар 100 минг аҳолига тўғри келадиган кўрсаткич 2024 йилдаги 29,1 тадан 27,8 тага тушган. Шунга қарамай, Жанубий Корея Иқтисодий ҳамкорлик ва тараққиёт ташкилоти (OECD) мамлакатлари орасида ўз жонига қасд қилиш даражаси энг юқори давлат бўлиб қолмоқда.
2026 йилнинг январь–июль ойларида бундай ўлимлар сони ўтган йилнинг шу даврига нисбатан 12,3 фоизга камайган: 8 475 нафардан 7 432 нафарга тушган. Расмийлар иқтисодий қийинчиликлар билан боғлиқ ҳолатлар камайганини қайд этган. Бироқ ёшлар орасидаги вазият мураккаблигича қолмоқда.
13 октябрь куни президент ҳукумат йиғилишида ёшлар орасида ўз жонига қасд қилиш кўрсаткичи ошиб бораётганини билдирган. У бунга сабаб бўлиши мумкин бўлган омиллар қаторида кучли рақобат, ўқишдаги босим ва мактаблардаги безориликни санаб ўтган ҳамда профилактика чораларини кучайтиришга чақирган.
12 октябрь куни Жанубий Корея ҳукумати 2030 йилгача мўлжалланган ўз жонига қасд қилишнинг олдини олиш дастурини тасдиқлаган. Дастур қарздорлик, қашшоқлик ва ижтимоий яккаланиш муаммоларига дуч келган фуқаролар учун психологик ёрдам ва маслаҳат хизматларини кенгайтиришни назарда тутади. Ҳукумат ўз жонига қасд қилиш кўрсаткичини ҳар 100 минг аҳолига 18,9 тагача камайтиришни мақсад қилган.
