2022 йил якунигача барча ҳудудда буйрак трансплантацияси амалиёти йўлга қўйилади
2022 йил якунигача барча ҳудудларда буйрак трансплантасияси амалиёти йўлга қўйилиб, инсон аъзолари ва тўқималари трансплантацияси илмий лабораторияси ташкил этилади. Шунингдек, 2022–2023 йилларда кам инвазив ва юқори технологик жарроҳлик амалиётлари кўлами кенгайтирилади. Президент бу хусусда қарор қабул қилди.
Унга кўра, туман (шаҳар)ларда амалиётлар тури 60 тадан 79 тага, ҳудудларда эса 130 тадан 168 тага етказилиб, хирургия марказида юрак ва ўпка трансплантацияси жорий этилади.
2021 йилда юрак нуқсонларини даволаш учун мўлжалланган 500 та тиббий буюм (окклюдер) харид қилиш режалаштирилган. Бунинг учун Соғлиқни сақлаш вазирлигига 10 миллиард сўм ажратилган.
Бундан ташқари, 2021 йилда Республика ихтисослаштирилган хирургия илмий-амалий тиббиёт маркази филиаллари 42,5 миллиард сўмлик замонавий асбоб-ускуналар билан жиҳозланади.
2022 йилдан бошлаб ҳар йили ўртача 2 500 та окклюдер (тиббий буюм) харид қилиш учун маблағлар ажратиш белгиланди.
Шу билан бирга, 2021-2022 ўқув йилидан Тошкент тиббиёт академиясининг Хирургия ва трансплантология кафедраси ташкил этилади.
Қарорга кўра, 2021 йил 1 ноябрдан Республика ихтисослаштирилган илмий-амалий тиббиёт марказлари ва бошқа давлат тиббиёт муассасалари раҳбарларини соғлиқни сақлаш соҳасида бошқарув йўналиши бўйича қисқа муддатли ўқув курсларида қайта тайёрлаш ҳамда малакасини ошириш йўлга қўйилади.
2022-2023 ўқув йилида соғлиқни сақлаш соҳаси учун 50 нафар менежер мутахассисларни магистрлик йўналиши бўйича давлат гранти асосида Тошкент шаҳридаги Халқаро Вестминстер ва бошқа ОТМларда тайёрлаш билан боғлиқ харажатларни қоплаш чоралари кўрилади.
Бундан аввал хусусий шифохона томонидан кимлар бепул даволаниши мумкинлиги, Ўзбекистонда фармацевтикага ихтисослашган янги университет ташкил этилиши ҳамда Президент Ўзбекистонда пандемиянинг кейинги тўлқинларига йўл қўймаслик учун 3 та муҳим шартни айтгани ҳақида хабар берилганди.
Оламгир Абдиев
