Давлат хавфсизлик хизмати ва Бош прокуратура ҳузуридаги Департамент томонидан ўтказилган тезкор тадбирларда турли вилоятларда ноқонуний ер савдоси билан боғлиқ ҳолатлар аниқланди.
Навоий вилоятида тадбиркор 1 гектар ер майдонини ўзига тегишли деб кўрсатиб, уни 2 миллиард сўмга сотмоқчи бўлган. У 1 миллиард сўм олган вақтида қўлга олинди. Андижон вилоятида эса ака-ука давлат захирасидаги 2 гектар ерни 300 минг АҚШ долларига сотишга уринган, улардан бири 50 минг доллар олганида ушланди.
Фарғонада фермер хўжалиги раҳбари 50 сотих ер майдонини 55 минг АҚШ долларига сотишга келишиб, 45 минг долларни олганида қўлга тушди. Тошкент вилоятида эса давлат захирасидаги 16 сотих ерни 352 минг АҚШ долларига сотмоқчи бўлган фуқаро ва унинг шериги олдиндан 30 минг доллар олган вақтида ушланиб, ноқонуний ҳаракатларига чек қўйилди.
Барча гумонланувчиларга нисбатан Жиноят кодексининг тегишли моддалари бўйича иш очилиб, тергов ҳаракатлари олиб борилмоқда.