Андижонда Кобальт ҳайдовчиси ЙПХ инспекторини “босиб кетди”
Холат юзасидан вилоят ИИБ ЙҲХБ маълумот берди.
Ижтимоий тармоқларда “Андижонда Кобальт ҳайдовчиси ГАИ ходимини автомашина капотида сайр қилдирди” сарлавҳали видеохабарлар тарқалди. Ҳолат юзасидан вилоят ИИБ ЙҲХБ маълумот берди.
Ҳолат 15 сентябрь куни соат 22:00 ларда Андижон шаҳрининг Миллий тикланиш ва Амир Темур шоҳкўчалари кесишмасида содир бўлган. Мазкур чорраҳада хизмат ўтаётган ЙПХ инспектори Бобур майдонида хизмат олиб бораётган инспекторнинг хабарига кўра Кобальт русумли автомашинанинг тўхтамасдан ҳаракатланаётгани бўйича маълумот олган. Шундан сўнг ходим ушбу автомашинани тўхтатмоқчи бўлиб, унинг олдига келган ва бир неча бор огоҳлантириш берган. 2003 йилда туғилган ҳайдовчи инспекторнинг тўхташ буйруғига бўйсунмасдан, унинг устига бостириб кетган. Инспектор эса ўзини олиб қочишга улгурмай, автомашинанинг олди капот қисмига осилиб қолган. Автомашина жойидан кескин қўзғалишиб, ўнг томонга кескин бурилган вақтида инспектор автомашина капотидан сирпаниб йиқилиб тушган.
Ҳодиса оқибатида инспекторнинг қўл-оёқлари жароҳатланган ва алоқа воситалари синиб шикастланган.
“Мисрда Ал-Азҳар институтида ўқийман. Воқеадан олдин машина ёритгичларини ўзгартирганим учун инспектор тўсиб, баённома расмийлаштирганди. Бу сафар иккинчи марта тўхтатса, машинани олиб кириб қўйиши мумкин деб бўйсунмасдан кетгандим”, — дейди ҳайдовчи.
Фуқаро К.В.га нисбатан Маъмурий жавобгарлик тўғрисидаги кодекснинг 194-моддасига асосан маъмурий баённома расмийлаштирилган ва автомашина вақтинчалик жарима майдонига жойлаштирилган.
Ҳолат юзасидан Ўзбекистон Республикаси ИИВ ШХББ Андижон вилояти бўйича бошқармаси ҳамда Андижон шаҳар прокуратураси томонидан суриштирув ҳаракатлари олиб борилмоқда.
