АҚШ Бразилия президентига босим ўтказмоқда
Бунга Россия билан боғлиқ вазият сабаб бўлган.
АҚШ Бразилия президентининг Россияга ташрифини бекор қилиш мақсадида дипломатик босим ўтказмоқда. Бу ҳақда “ТАСС” хабар берди.
Нашрнинг "Folha de S.Paulo" газетасига таяниб маълум қилишича, бундан кўзланган мақсад Украинадаги вазият фонида РФ президенти Владимир Путинни дипломатик изоляция қилиш. Газета маълумотларига кўра, Жаир Болсонару (Бразилия президенти)нинг Москвага ташрифи АҚШ дипломатларида хавотир уйғотмоқда, сабаби — бу Бразилиянинг Россиянинг Европа шарқидаги хатти-ҳаракатларини қўллаб-қувватлаши тўғрисида ўзига хос сигнал бўлиши мумкин.
Байден администрациясининг фикрича, Болсонару ташрифининг бекор қилиниши Путинга “Украина чегарасидаги ҳарбий иштироки қисқармаган тақдирда, дипломатик изоляцияга тушиши мумкинлиги”ни кўрсатади.
Бразилия ТИВ, ўз навбатида, АҚШ давлат департаментига президент ташрифини геосиёсий призмадан ташқарида кўришни маслаҳат бермоқда.
Аввалроқ АҚШ Россия-Украина чегарасидаги вазият ортидан Европага қўшимча куч жўнатгани тўғрисида хабар қилинганди.
