Арманистон Президенти Ваагн Хачатурян Россия билан муносабатлар эндиликда “ака-ука” эмас, балки шериклик асосида йўлга қўйилганини маълум қилди. RTVI телеканалига берган интервьюсида у Ереваннинг охирги йилларда мустақил сиёсат юритишга интилаётганини айтди.
“Ҳозир Россия билан муносабатлар бутунлай бошқача – шериклик муносабатлари. Россиянинг Арманистонга муносабати катта аканинг кичик укасига эмас, балки шериклик даражасида. Биз сўнгги тўрт йил давомида айнан шунга интиламиз”, деди Президент.
Хачатуряннинг сўзларига кўра, Арманистон расмийлари Москва ҳамкасбларининг мамлакат мустақил қарорларини ҳисобга олишини истайди. У, шунингдек, Россия Бош вазири ўринбосари Алексей Оверчукнинг ЕОИИ ва Европа Иттифоқи ўртасида танлов қилиш зарурлиги ҳақидаги баёнотига изоҳ бериб, Арманистон кўп тармоқли иқтисодиётга эга эканини таъкидлади.
Арманистон Президенти 4 апрель куни мамлакатнинг Европа Иттифоқига кириш жараёнини бошлаб берувчи қонунни имзолаган эди. Бу эса Россия томонидан Ереваннинг ЕОИидан чиқишга қадам сифатида баҳоланган бўлса-да, Арманистон иқтисодиёт вазири мамлакат иттифоқдан чиқиш ниятида эмаслигини билдирди.