Байден GM режаларини минг йил "ортга сурди"
АҚШ Президенти яна адашиб кетди.
АҚШ Президенти Жо Байден мамлакатнинг энг йирик автомобиль ишлаб чиқарувчиси “General Motors” 3035 йилга қадар тўлиқ электрон транспорт воситалари ишлаб чиқаришга ўтишини айтиб, яна адашиб кетди.
“Компания бош директори Мери Барра Калифорния штатини судга берди, чунки сизда эмиссия даражаси мамлакатнинг қолган қисмига қараганда юқори. У менга қўнғироқ қилди ва улар 3035 йилгача тўлиқ электр қувватига эга бўлишини айтди”, – деди Президент Америка телеканаллари томонидан намойиш этилган Калифорниядаги нутқида.
Бунгача Байден ўша нутқида дастлаб GM бош директорини АҚШ Олий суди судьяси Эми Кони Баррет билан адаштириб юборган, бироқ фикрларини жамлашга муваффақ бўлган.
Маълумот ўрнида, 2021 йил январь ойида “General Motors” 2035 йилгача фақат электромобил ишлаб чиқаришни режалаштираётганини эълон қилди. Ноябрь ойида Президентнинг иқлим ўзгариши бўйича махсус вакили Жон Керри 2035 йилга бориб АҚШда фақат электромобиллар сотилишини айтган эди.
