Бош прокуратура бир қатор мутасаддиларга нисбатан текширув бошлади
Ҳозирда айбдор шахсларга нисбатан тегишли чора кўриш юзасидан ўрганиш ишлари бошланган.
Экология, атроф-муҳитни мухофаза қилиш ва иқлим ўзгариши вазири 4 июль куни Азиз Абдухакимов Қонунчилик палатаси ялпи мажлисида «Яшил макон» умуммиллий лойиҳаси доирасида бажарилган ишлар юзасидан ахборот берганди.
Унда қайд этилишича, Навоий вилоятида 959 минг, Тошкент вилоятида 564 минг, Фарғона вилоятида 465 минг, Қашқадарё вилоятида 227 минг туп кўчат қўшиб ёзилгани аниқланган.
Шунингдек, 1,8 миллион туп кўчатни сақлаш ва парваришлаш учун тегишли масъуллар белгиланмаган. Бундан ташқари, 7,3 миллион туп кўчат суғориш тизимлари мавжуд бўлмаган ҳудудларга экилгани ҳақида маълум қилинди.
Бош прокуратуранинг хабар беришича, мазкур ялпи мажлисда Бош прокуратуранинг Экология, атроф-муҳитни муҳофаза қилиш ва ўрмон хўжалиги соҳасидаги қонунчилик ижроси устидан назорат бошқармаси бошлиғи Ўктам Ўтаев ҳам иштирок этиб, айтилган камчиликлар Бош прокуратура томонидан алоҳида назоратга олинган.
Қайд этилишича, ҳозирда Бош прокуратура ва вазирлик мутахассисларидан иборат тузилган ишчи гуруҳ ҳолатга қонуний баҳо бериш ва айбдор шахсларга нисбатан тегишли чора кўриш юзасидан ўрганиш ишларини бошлади.
