Ижтимоий тармоқларда Қашқадарё вилоят судининг апелляция инстанцияси мажлисида суд жараёни якунига етгач, ишда ҳимоячи сифатида қатнашган адвокат томонидан судьяга нисбатан қўпол муомала ва ҳақорат акс этган видеолавҳалар тарқалди.
Тергов маълумотларига кўра, адвокат Л. Шарипов суд залида фуқаролар олдида шовқин кўтариб, мобил телефонининг камераси орқали судьяга провокация қилган ва судьяга нисбатан босим ўтказишга уринган. Мазкур ҳолат суд тартибига зид ҳисобланади.
Суд томонидан адвокатнинг ҳаракатларига нисбатан ҳуқуқий баҳо бериш мақсадида Қашқадарё вилоят прокуратураси ва Адвокатлар палатаси Қашқадарё вилоят ҳудудий бошқармасига тегишли ҳужжатлар юборилди.
Эътибор қаратиш лозимки, суд қароридан норози томонлар қонунда белгиланган тартибда юқори инстанцияга шикоят қилиш ҳуқуқига эга. Судьяга нисбатан ҳақоратли сўзлар ишлатиш, қўпол муносабатда бўлиш ёки шу йўл билан босим ўтказиш уринишлари қонунга хилофдир ва тегишли тартибда ҳуқуқий баҳоланиши шарт.
Суд жараёнида қатнашувчи барча шахслар, жумладан адвокатлар ҳам, суд одоби қоидаларига, қонун талабларига ва суд ҳокимияти обрўсини ҳурмат қилишга қатъий риоя қилиши лозим.