Шу йилнинг 17 ноябрь куни Бухоро вилоятининг Жондор туманидаги қишлоқлардан биридаги оилада газ портлаши юз берди. Бахтсиз ҳодиса эрта тонгда – 5:30 лар атрофида содир бўлган.
Маълумотларга кўра, ҳодиса оқибатида оиланинг 4 нафар аъзоси: эр-хотин ва уларнинг икки нафар қизи куйиш жароҳатини олиб, РШТЁИМ Бухоро филиалига олиб борилган. Ота ва она 75 фоиздан юқори куйиш жароҳатлари оқибатида вафот этган. Қизларнинг аҳволи яхши экани айтилмоқда. Оиланинг яна 2 нафар ўғил фарзанди жароҳат олмаган.
Ҳолат юзасидан ФВВ ва "Ҳудудгазтаъминот" матбуот хизматлари билан боғландик. Улар ҳолатни ўрганиб, расмий изоҳ беришини маълум қилди.
Маълумот учун: жорий йилнинг 11 ойида 82 киши ис газидан заҳарланиб вафот этган. Газ билан боғлиқ 74 та бахтсиз ҳодиса оқибатида яна 80 киши жароҳатланган.