Бухоро вилояти Бухоро шаҳридаги 4-сонли умумтаълим мактабида ўқитувчи ўқувчиларни калтаклаб дарс ўтгани ҳақидаги видео ижтимоий тармоқларда муҳокамаларга сабаб бўлганди. Бухоро вилояти Халқ таълими бошқармаси матбуот хизмати берган маълумотларга кўра, мазкур ўқитувчи ўз аризасига кўра вазифасидан озод этилган.
Қайд этилишича, ушбу ҳолат Бухоро вилоятида фавқулодда вазият сифатида баҳоланиб, шу куннинг ўзида вилоят ҳокими ўринбосари Мирали Ҳамроев раҳбарлигида халқ таълими бўлимлари мудирлари, мактаб директорлари иштирокида ZOOM орқали йиғилиш ўтказилиб, бу ҳолат кенг муҳокама қилинган.
Шунингдек, ўқитувчиларнинг педагогик маданиятини ошириш ва бундай хунук ҳолатларнинг олдини олиш борасида қатъий топшириқлар берилган.
Ҳозирда мазкур ҳолат бўйича ўрганиш ишлари ҳуқуқ-тартибот идоралари ҳамкорлигида давом этмоқда.