COVID-19'га қарши эмланган меҳнат мигрантларини Россияга юбориш пилот лойиҳаси бошланди
Россиянинг 40 нафар тиббиёт ходими Ўзбекистонга етиб келди.
Хабарингиз бор, жорий йилнинг сентябрь ойида Россия Федерацияси Меҳнат ва аҳолини ижтимоий ҳимоя қилиш вазири ўринбосари Андрей Пудов бошчилигида Қурилиш ва уй-жой хўжалиги, Ички ишлар ва Соғлиқни сақлаш вазирликлари, Роструд, Москва ҳукумати ҳамда "Роскапстрой", "Нострой", "Наймикс", "Алмас-интеграл", "ПИК Индустрия", "Ренейссанс Хеви Индастрис", "Яндекс" каби йирик иш берувчи корхоналар вакилларидан иборат делагация Ўзбекистонга ташриф буюрган эди.
Ўзбекистон фуқароларини Россия Федерациясига юбориш бўйича пилот лойиҳаси бошланди.
Маълумот учун: ушбу лойиҳа доирасида номзодларни ишга жалб қилиш билан боғлиқ, жумладан, тиббий кўрикдан ўтказиш, эмлаш, рус тили, Россия қонунчилиги бўйича имтиҳон топшириш, патент расмийлаштириш ва транспорт харажатлари иш берувчилар томонидан қопланади.
Соғлиқни сақлаш вазирлиги Жамоатчилик билан алоқалар бўлими раҳбари Фурқат Санаевнинг хабар қилишича, 10 минг нафар фуқарони Россия Федерациясига ташкилий тарзда ишга жўнатиш тадбирларини амалга ошириш мақсадида тиббий асбоб-ускуналар билан Ўзбекистонга келди.
Эндиликда Россия ҳудудида ишлаш ҳуқуқини берувчи патент олишда талаб этиладиган тиббий кўрик Россия соғлиқни сақлаш вазирлиги томонидан Тошкентда ўрнатилган тиббий асбоб-ускуналар ёрдамида юртимизда амалга оширилади.
Эслатиб ўтамиз, Россия Федерацияси ҳудудида меҳнат фаолиятини олиб бориш истагида бўлган фуқароларни эмлаш ва коронавирусга қарши тест топшириш жараёнларини икки давлат мутахассислари томонидан Россия томони тиббий ускуналари ёрдамида биргаликда Ўзбекистонда амалга ошириш ҳамда уларнинг натижаси бўйича тиббий маълумотларни "COVID-19'сиз саёҳат" иловаси тизимига интеграция қилинади.
Аввалроқ Россия Ўзбекистоннинг 150 минг фуқаросига мамлакатга киришга қўйилган тақиқни олиб ташлагани, ўзбекистонлик қурувчиларни Россияда “космик истиқболлар” кутаётгани, миграция тўғрисида ягона ҳужжат жорий этилгани ҳамда мигрантларга махсус чипли пластик карталар тарқатилгани ҳақида хабар берилганди.
