Ўзбекистонлик қурувчиларни Россияда “космик истиқболлар” кутмоқда
Россия қурилишига, шу жумладан “Восточный” космодромига, октябрь ойида 10 минг ўзбекистонлик жалб этилиши кутиляпти.
Россия қурилиш ва уй-жой коммунал хўжалиги вазири ўринбосари Никита Стасишиннинг сўзларига кўра, қурувчилар шу ойнинг ўзидаёқ синов лойиҳаси доирасида мамлакатга келишади.
Мутасадди сўзларида давом этар экан, “Масала юзасидан Ўзбекистонлик ҳамкасбларимиз, қолаверса Роструд ва Федерал тиббий-биологик агентлиги билан деярли ҳар куни иш олиб боряпмиз”, — дея маълум қилган.
Муҳожирларни Россияга келишидан аввал “Спутник Лайт” билан вакцина қилиш режалаштирилган.
Маълумот ўрнида, мазкур масала бўйича жорий йилнинг 10-11 сентябрь кунлари Россия Федерациясининг меҳнат миграцияси бўйича делегациясининг мамлакатимизга ташрифи доирасида кенг музокаралар олиб борилганди.
Унга кўра,
— Қурилиш соҳасида меҳнат фаолиятини амалга ошириш учун Россия Федерациясига жўнатиладиган номзодларни ишга жалб қилиш билан боғлиқ, жумладан, тиббий кўрикдан ўтказиш, эмлаш, рус тили, Россия тарихи ва қонунчилиги бўйича имтиҳон топшириш, патент расмийлаштириш ва транспорт харажатлари иш берувчилар томонидан қопланиши кўзда тутилган.
— Россия Федерацияси ҳудудида меҳнат фаолиятини амалга ошириш истагида бўлган фуқароларни эмлаш ва коронавирусга қарши тест топшириш жараёнлари икки давлат мутахассислари томонидан Россия томони тиббий ускуналари ёрдамида биргаликда Ўзбекистонда амалга оширилади.
— Россия Федерацияси ҳудудида меҳнат фаолиятини амалга ошириш истагида бўлган фуқаролар учун патент олишда талаб этиладиган дактилоскопик рўйхатга ва расмга олиш жараёнларини икки давлат Ички ишлар вазирликлари томонидан Россия томони ускуналари ёрдамида Ўзбекистонда амалга оширилади.
Аввалроқ Россияда миграция тўғрисида ягона ҳужжат жорий этилганди. Шунингдек, ўн минг Ўзбекистонлик яқин вақт давомида Россияга ишга жалб қилиниши, Ташқи Меҳнат миграцияси орқали ишлашга кетган фуқароларнинг норозилиги, Россияда юз берган оммавий муштлашувда иштирок этган мигрантлар 40 йилга депортатция қилингани ҳамда Россия мигрантларга янги мажбурият юкламоқчилиги ҳақида хабар берилганди.
