Деҳқонободлик мактаб ўқитувчиси МДҲнинг 2021 йилдаги энг ёш олими бўлди
Шунингдек, у “Халқаро тоифадаги ўқитувчи” мақомини ҳам қўлга киритди.
1-тоифали ўқитувчи Дилноза Мадраҳимова Деҳқонобод тумани халқ таълими бўлимига қарашли 69-ИДУМда она тили ва адабиёти фанидан дарс беради. У Қозоғистоннинг Нурсултон шаҳрида МДҲ миқёсида ўтказилган “Йил педагоги-2021” ҳамда “Энг ёш олим-2021” халқаро илмий-амалий онлайн мақолалар кўрик танловида “Таълимга оид инновацион ёндашувлар” йўналиши бўйича илмий мақолалари билан иштирок этиб, ғолибликни қўлга киритди.
Ўқитувчи иккита йўналиш бўйича 1- ва 2-ўринларга сазавор бўлди ва кўкрак нишони, диплом билан тақдирланди. Шу билан бирга унинг илмий мақолалари журналда чоп этилиб, “Халқаро тоифадаги ўқитувчи” мақомини қўлга киритди.
“Бу ютуқларга эришишимда туман халқ таълими, мактаб жамоаси ва барча устозларимга, шулар қаторида илмий раҳбарим профессор Носиржон Улуғовга мингдан-минг раҳмат айтаман”, — дейди Дилноза Мадраҳимова.
Эслатиб ўтамиз, аввалроқ инновацион платформа ўқитувчилар малака ошириши учун янги имконият экани ҳамда ўқитувчиларга аттестациядан ўтганлик тўғрисидаги сертификат электрон шаклда берилиши ҳақида хабар берилганди.
