Ғазода Исроил ҳужумлари давом этмоқда: олти фаластинлик ҳалок бўлди

Маҳаллий тиббиёт манбаларига кўра, Исроил кучлари Ғазо секторида камида олти нафар фаластинликни, жумладан, бир ота ва унинг 13 ёшли ўғлини ўлдирган. Бу ҳақда Al Jazeera хабар берди.

 

Сешанба куни Ғазо шаҳрининг Дараж мавзесида жойлашган Ғубайн оиласининг уйига Исроил томонидан берилган ҳаво зарбаси оқибатида уч киши ҳалок бўлган. Шаҳарнинг Зайтун маҳалласидаги чодирга уюштирилган алоҳида ҳаво ҳужуми натижасида ота ва унинг ўғли ҳалок бўлган. Ғазо секторининг жанубидаги Хон Юнис шаҳрида эса бир эркак Исроил ҳарбийларининг ўқ узиши оқибатида ҳаётдан кўз юмган.

 

Бу қурбонлар сони мавсумнинг дастлабки кучли бўрони ортидан юз берган талафотлар фонида қайд этилмоқда. Дам олиш кунлари Ғазода 12 соат ичида қарийб 70 мингта чодирни сув босган. Ғазо ҳукумати Медиа офиси маълумотига кўра, камида беш киши ҳалок бўлган, етказилган зарар тахминан 3 миллион долларга баҳоланган.

 

Исроил Ғазога 60 мингта кўчма уй ва 200 мингта чодир олиб кирилишига тўсқинлик қилмоқда. Ҳудудга фақат 20 мингта чодир киритилишига рухсат берилган. Уруш оқибатида Ғазодаги уй-жойларнинг қарийб 85 фоизи вайрон бўлган ёки шикастланган. Шунингдек, Исроил ҳудудга ўта зарур гуманитар ёрдам етказилишини ҳам чекламоқда.

 

Айни пайтда музокараларда ҲАМАСнинг қуролсизланиши ва Исроил қўшинларининг Ғазодан олиб чиқилиши шартлари бўйича келишувга эришилмаган. Исроил ҳозирда ҳудуднинг қарийб учдан икки қисмини назорат қилмоқда ва у ердаги фаластинлик аҳолига ўз яшаш жойларини тарк этиш буюрилган.

 

Ўтган йили «ўт очишни тўхтатиш» келишуви тузилганига қарамай, Ғазо Исроилнинг мунтазам ҳужумларига учрамоқда. Ғазо Соғлиқни сақлаш вазирлиги маълумотига кўра, АҚШ воситачилигида тузилган сулҳ келишувидан буён Исроилнинг ҳужумлари оқибатида қамал остидаги ҳудудда 1600 нафардан ортиқ фаластинлик ҳалок бўлган.

 

Вазирлик маълум қилишича, 2023 йил 7 октябрдан буён Исроилнинг Ғазога қарши олиб бораётган уруши оқибатида 74 минг нафардан ортиқ киши ҳалок бўлган.