Дунёдаги энг узун бўйли аёл илк бор самолётда учди
Бунинг учун 6 та ўриндиқ олиб ташланган.
Дунёдаги энг узун бўйли аёл ҳисобланган Туркия фуқароси умрида биринчи марта йўловчи лайнерига чиқиб, Шимолий Америка қитъасига парвоз қилди.
Румеиса Гелгининг бўйи 215,16 смни ташкил этади. Бундай антропометрик кўрсаткичлар туфайли аёл Гиннеснинг рекордлар китобига кирган. Унинг парвози 13 соат давом этди.
25 ёшли аёл тез ўсишни келтириб чиқарадиган кам учрайдиган генетик касаллик — Веавер синдроми туфайли ногиронлар аравачасидан фойдаланишга мажбур. Уни самолёт салонига жойлаштириш учун олтита ўриндиқ ўрнига махсус замбиллар ўрнатилди.
Истанбулдан Сан-Франсискога парвоздан сўнг Гелги ўз ҳис-туйғуларини ижтимоий тармоқлардаги 20 мингга яқин обуначилари билан бўлишди:
"Ушбу парвоз илк дақиқадан сўнгги дақиқагача бўлган ажойиб саёҳат бўлди. Бу менинг биринчи марта самолётда учишим эди, лекин, албатта, охиргиси emas... унда иштирок этган барчага чин дилдан раҳмат", — деб ёзди Гелги.
Маълумот ўрнида, аёл дастурий таъминот соҳасида ишлайди ва АҚШда камида 6 ой қолишни режалаштирмоқда.
