Эркак тўққиз ёшли қизни онасининг кўз ўнгида ўлдирди

 

Кабардин-Балкарияда эркак жаҳл устида 9 ёшли ўгай қизини бошини ерга уриб ўлдириб қўйди. Бу ҳақда kavkaz.mk.ru хабар қилди. 

 

Маълум бўлишича, эркак доимий равишда оиласига зулм ўтказиб келган. Ўша куни маст холда уйга келиб ўгай қизини урган. Қиз онасига ўгай отасининг шафқатсизлигидан шикоят қилган. Бу эркакнинг ғазабини қўзғатган. У ўгай қизини хонасига чақирган ва у ерда қизнинг бошини полга бир неча марта урган. Қизча ўзини ёмон ҳис қилган, аммо онаси шифокор чақирмай қизни ухлатишга ётқизган.

 

Эртаси куни қиз қайта уйғонмаган . Ота-онаси тез ёрдам машинасини чақирган. Иккаласи ҳам боланинг ўлими бахтсиз ҳодиса натижасида содир бўлганини даъво қилган.

 

"Аёл ва унинг норасмий турмуш ўртоғи терговни чалғитиш мақсадида қизчани бир кун аввал дарахтдан ўзи йиқиб тушганини сабаб қилиб кўрсатишган" — дейилади республика тергов бошқармаси хабарида.

 

Бироқ экспертиза қизни қасдан ўлдирилганини аниқлади. Мазкур ҳолат юзасидан Россия Федерацияси Жиноят кодексининг 105-моддаси (“вояга етмаган болани ўлдириш”) билан жиноят иши қўзғатилган.

 

Шунингдек суриштирув давомида аёл спиртли ичимликларга ружу қўйгани ва 6 та фарзандига деярли эътибор қаратмаганлиги маълум бўлди. Аёлнинг қолган 5 та фарзанди давлат қарамоғига ўтказилди.

 

Аввалроқ, Ўз отаси ва унинг рафиқасини ўлдирган чустлик фарзандга суд ҳукми ўқилгани ҳамда Қашқадарёда эркак ўз ўғлини ўлдириб қўйгани ҳақида хабар бергандик. 

 

Муножат Валиева