Фаластин BRICS’га аъзолик учун ариза бермоқчи
Россия президенти Владимир Путин ташкилотнинг Қозонда ўтадиган сессиясини тўлиқ Фаластин масаласига бағишлашга ваъда берган.
Фаластин октябрь ойида Қозонда ўтказиладиган саммитдан кейин BRICS аъзолиги учун ариза бериш ниятида. Бу ҳақида мамлакатнинг Россиядаги элчиси Абдул Ҳофиз Нофал маълум қилди.
"Саммитдаги биринчи иштирокимиздан кейин биз ушбу ташкилотга қўшилиш бўйича сўров юборамиз. Ва Россия президенти Владимир Путин сессия тўлиқ Фаластинга бағишланишига ваъда берди, шу боис ушбу саммитдан фақат ижобий натижаларни кутмоқдамиз", — дейди элчи.
Нофал, шунингдек, саммитга таклиф этилганини Фаластин халқини қўллаб-қувватлаш белгиси деб атади. Халқаро гуруҳнинг навбатдаги саммити 22-24 октябрь кунлари Қозонда бўлиб ўтади.
BRICS — иқтисодий ҳамкорлик ташкилоти. 2001 йилда британиялик иқтисодчи Жим Онил жаҳон иқтисодини ўрганиш жараёнида бир гуруҳ катта давлатларда иқтисодий тизимли ўсишга эътибор бериб, шартли равишда BRIC деб атайди (Бразилия, Россия, Ҳиндистон, Хитой). 2010 йилда бунга ЖАР қўшилди, бугун ташкилотда тўққизта давлат бор.
2023 йил 23 август куни ЖАР президенти Сирил Рамапоса Аргентина, Эрон, Саудия Арабистони, Миср, Эфиопия ва Бирлашган Араб Амирликларига тўлақонли аъзо сифатида ташкилотга қўшилиш таклифи билдирилганини маълум қилганди. Кейинриоқ Аргентина BRICS’га қўшилишдан бош тортган.
