Панамада 7,7 магнитудали зилзила: цунами хавфи ҳақида огоҳлантириш берилди
Хавфсизлик нуқтаи назаридан метронинг иккита линиясида ҳаракат вақтинча тўхтатилган.
9 октябрь куни Панаманинг жанубида 7,7 магнитудали зилзила содир бўлди. Ер силкинишлари мамлакат пойтахти Панама шаҳрида ҳам сезилган. Бу ҳақда АҚШ Геология хизмати (USGS) маълум қилди.
Хизматнинг дастлабки маълумотларига кўра, зилзила эпицентри Питалоса-Арриба қишлоғидан 12 километр ғарб-жануби-ғарбда, ўчоғи эса тахминан 12,6 километр чуқурликда жойлашган.
Зилзиладан сўнг Тинч океанининг шарқий қирғоқбўйи ҳудудлари учун цунами хавфи ҳақида огоҳлантириш эълон қилинган.
Reuters хабарига кўра, Панама канали маъмурияти зилзиладан кейин канал одатдаги тартибда ишлаётганини билдирган. Хавфсизлик нуқтаи назаридан Панама шаҳри метросининг иккита линиясида ҳаракат вақтинча тўхтатилган.
Шунингдек, 9 октябрь куни Панама ҳудудида 6,6 магнитудали яна бир зилзила қайд этилган. Унинг эпицентри Рио-Гранде дарёсидан 14 километр ғарбда, ўчоғи эса 10 километр чуқурликда жойлашган.
Тинч океанидаги цунами ҳақида огоҳлантириш марказининг кейинги бюллетенида дастлабки зилзила туфайли юзага келган цунами хавфи бартараф этилгани маълум қилинган. Шу билан бирга, айрим қирғоқбўйи ҳудудларида бир неча соат давомида денгиз сатҳининг бироз тебраниши кузатилиши мумкинлиги қайд этилган.
