Фарғонада эркак алимент ўрнига фарзандига уй олиб берди
Шу тариқа 18 йиллик алимент олдиндан тўлиқ тўланган.
Фарғона вилоятининг Ўзбекистон туманида ота фарзандининг 18 ёшгача бўлган 65 миллион сўмлик алимент пулларини уй-жой олиш мақсадида олдиндан тўлаб берди. Бу ҳақида МИБ ахборот хизмати хабар бермоқда.
“Бу эзгу ишга МИБнинг Ўзбекистон туман бўлими ходимлари кўмаклашди. Улар ота-она ўртасида муросага эришиб, фарзанд манфаатини устун қўйишди. Отанинг қарори, оддий алимент эмас, балки фарзандининг келажакда ўз бошпанасига эга бўлишини таъминлашдир.
Мазкур маблағ, онанинг эҳтиёжларини қоплайди, асосийси эса, фарзанднинг таълим олиши, саломатлиги ва келажакда мустақил ҳаёт кечириши учун муҳим таянч бўлади. Ота, фарзандини ёлғиз қолдирмаслигини, ҳамиша ёнида бўлишини ҳам таъкидлади. Бу чин оталик меҳрининг ёрқин ифодасидир”, дейилади хабарда.
