Куни кеча Тошкент халқаро кинофестивали очилиши арафасида халқ орасида ”Панорама” деган ном билан танилган бино қайта капитал таъмирланиб, янгича қиёфа касб этиб республика “Киночилар уйи”га айлантирилди. Бу ерда миллий кино музейи ҳам ўрин олган. Маълумки, сифатли кино яратиш учун яхши мутахассислар билан бирга илғор кинотехнология ва асбоб-ускуналар ҳам керак. Сўнгги йилларда миллий кинони янада ривожлантириш учун кенг кўламли ишлар олиб борилмоқда.
Фирдавс Абдухаликов, Ўзбекистон Кинематография агентлиги бош директори:
— Ўзбек киноси мавқеи ва обрў эътиборини қайта тиклаш, бу борадаги ишларни янада ривожлантириш — агентлик олдида турган энг долзарб вазифалардан биридир. Бунинг учун, албатта, кино асарларимизни бугунги замон талаблари даражасига кўтаришимиз, жаҳон кино саноати билан ҳамқадам ва ҳамсаф бўлшимиз керак. Бу, ўз навбатида, дунёнинг етакчи кинотехнологиялар ишлаб чиқарувчи компаниялар билан ҳамкорлик қилишимиз, замонавий кинотехнологиялардан самарали фойдаланишимизни тақозо этади.
Айни шу мақсадда 2019 йилдан буён Даниянинг “Danmon Group” компанияси вакиллари билан музокаралар олиб боряпмиз. Ана шу ҳамкорлик натижасида “Ўзбекфильм” киноконцерни учун хориждан 25 миллион евро қийматидаги янги замонавий технологияларни олиб келяпмиз.
Ушбу замонавий, энг сўнгги русумдаги техникалар жаҳон кинематографияси талабларига жавоб бера олиши билан аҳамиятлидир. Замонавий техникалардан нафақат ўзбек киноижодкорлари, балки бошқа мамлакатлар кинокампаниялари ҳам шартнома асосида фойдаланишлари мумкин. “Ўзбекфильм” киноконцернини тўлиқ қайта жиҳозлаш катта маблағ талаб қилади.
Шу боис, ушбу кинотехнологиялардан унумли фойдаланишимиз керак. Улардан фойдаланиш бўйича хорижий мутахассислар ва киноижодкорлар иштирокида машғулотлар олиб борилади. “Ўзбекфильм” киноконцернининг замонавий техника ва технологиялар билан қайта жиҳозланиши миллий кинематография ривожида муҳим ўрин тутиши, шубҳасиз.
Эслатиб ўтамиз, кинофестиваль бош ҳомийси: AGMK, NGMK вa “O‘zbekneftgaz”. Ҳамкор ҳомийлар: “O‘ZBEKTELEKOM”, “O‘zdonmahsulot” AK, “O‘zpromstroybank”ATB, “Ipoteka-bank” ATIB, “Asakabank”AJ, “O‘zbekiston temir yo‘llari”, “Hududgazta’minot”, “UzAuto Motors”AJ, “O‘zmetkombinat” AJ, “Milliy bank”AJ, “Farg’onaazot”AJ, “Eriell”, “Bosch” TM, “Easy Booking”.
Муножат Валиева