АҚШ президенти Доналд Трамп Ҳиндистон Бош вазири Нарендра Моди билан ўтказилган музокаралар якунида савдо ва энергетика соҳаларида муҳим келишувга эришилганини маълум қилди. Трампнинг айтишича, Ҳиндистон Россиядан нефть сотиб олишни тўхтатишга тайёрлигини билдирган, бунинг эвазига АҚШ Ҳиндистонга нисбатан бож тарифларини пасайтирган. Бу ҳақда РБС хабар берди.
Келишувга кўра, АҚШ Ҳиндистонга қўлланилган ўзаро тарифларни 25 фоиздан 18 фоизгача туширади. Мазкур савдо битими дарҳол кучга киради. Трамп бу қарорни Моди билан бўлган дўстона муносабатлар ва икки давлат ўртасидаги стратегик ҳамкорлик билан изоҳлади.
АҚШ президенти, шунингдек, Ҳиндистон келгусида АҚШ ва эҳтимол Венесуэладан нефть харидини оширишга рози бўлганини таъкидлади. Унинг фикрича, бу қадам Украинадаги можарони тугатишга қаратилган халқаро саъй-ҳаракатларга ҳисса қўшади.
Битим доирасида Ҳиндистон АҚШга нисбатан тариф ва тарифсиз тўсиқларни ноль даражагача туширишга интилади ҳамда энергия, кўмир ва қишлоқ хўжалиги маҳсулотларини ўз ичига олган 500 миллиард доллардан ортиқ қийматдаги Америка маҳсулотларини харид қилади.
Трамп Ҳиндистон билан муносабатлар келгусида янада мустаҳкамланишини қайд этиб, Моди билан ҳамкорликни юқори баҳолади.