ИИБ ходими ИИВ госпиталида вафот этди

2023 йилнинг 25 декабрь кунпи ички ишлар вазирлиги госпиталида ИИБ ходими вафот этди. Маълумотларга кўра, оёғи операция қилинган капитан Шуҳрат Рустамов кутилмаганда соғлиги ёмонлашиб, жонлантириш бўлимида вафот этган. У Тошкент вилояти Тошкент тумани ИИБда штаб бошлиғи лавозимида ишлаган.

 

Марҳумнинг яқинларига кўра, у ўлимидан бир кун олдин госпитал томонидан гўёки ўзига қилинган, аммо аслида қилинмаган дори-дармонлар рўйхатига имзо қўйиш масаласида шифокор билан тортишиб қолган.

 

Шуҳрат Рустамовнинг дадаси Равшан Рустамовнинг айтишича, шифокорлар ўғлига аслида қилинмаган дори-дармонлар рўйхатига имзо қўйдириб олишга ҳаракат қилишган.

 

“Вафотидан бир кун олдин кечқурун видеоалоқа орқали суҳбатлашдик. Ўғлим ҳамшира бир варақ дорилар рўйхатини олиб келиб, имзо қўйишни сўраганини, у имзо қўймаганлигини, сабаби мазкур дориларни ўз пулига кўчадан сотиб олиб келганини айтди. Кейин шу имзо масаласида шифокор билан ҳам тортишган. Яъни тиббиёт ходимлари аслида госпитал ҳисобидан қилинмаган дорилар рўйхатини ёзиб, гўёки муоалажа пайтида ушбу дорилар ишлатилганлиги ҳақида ўғлимга имзо қўйдириб олмоқчи бўлишган.

 

Бундан ташқари, ўғлимнинг тоби қочганида ҳамшира келиб, жойига ётқизиб, юзига сув сепган холос. Сув билан ҳам биринчи тиббий ёрдам кўрсатиладими? Шуҳрат боқувчи болам эди, икки фарзанди етим қолди”, дея таъкидлайди Равшан Рустамов.

 

Марҳумнинг яқинлари маълум қилишича, ўлим ҳолати юзасидан Олмазор тумани прокуратураси томонидан тергов ҳаракатлари олиб борилмоқда.

 

Олмазор тумани ФҲДЁ бўлимидан берилган маълумотномада Шуҳрат Рустамовнинг ўлимига ўпка эмболияси сабаб бўлгани қайд этилган.