Президентимиз Шавкат Мирзиёевнинг “Ипак йўли дурдонаси” Тошкент халқаро кинофестивали иштирокчиларига табригини Туризм ва спорт вазири Азиз Абдуҳакимов ўқиб эшиттирди.
Қайта тикланган Тошкент халқаро кинофестивали нафақат кинематография, балки сайёҳлик, санъат таълими, мамлакатга инвестициялар кириб келиши, халқаро ҳамкорликда муҳим аҳамият касб этади.
“Тинчлик, тараққиёт ва маърифат учун” шиори остида ташкил этилаётган мазкур халқаро кинофестиваль жаҳон миқёсида ҳам ўзига хос акс-садо берди.
Халқаро кинофестивалнинг дастури ғоят кенг ва ранг-баранг экани мазкур ижодий лойиҳанинг “Фестиваллар фестивали” сифатида ўтаётганидан дарак бермоқда. “Кино 5 кунда” ижодий лойиҳаси, янги-янги бадиий, ҳужжатли фильмлар тақдимоти, маҳорат сабоқлари, анжуманлар, тақдимотлар, кино юлдузлари иштирокидаги матбуот анжуманлари билан ҳамоҳанг бўлиб ўтмоқда.
Мамлакатимизнинг кўплаб ҳудудларида янги-янги кинотеатрлар қуриб, фойдаланишга топшириляпти. Ўн тўрт хорижий мамлакатнинг миллий кино кунлари томошабинларни жаҳон кинематографиясидаги энг илғор йўналишдаги анъаналар билан таништирмоқда. Шу билан бирга миллий кинематографиямиз истиқболига йўналтирилган янги-янги ҳамкорлик ҳужжатлари имзоланиши, янги ижодий лойиҳалар сари қадам қўйилиши бошланмоқда.
Кинофестиваль иштирокчиларининг фикр-мулоҳазалари:
Селим Байрактар, туркиялик кино актёр:
— Ўзбек диёри қадимий маданиятга, тарихга, дунё цивилизацияларига таъсир кўрсатган теран ва мустаҳкам илдизларига эга заминдир, – деди. — Бизнинг анъаналаримиз, қадриятларимиз, тарихимиз туташдир. Ўзбекистондек табаррук юртда ўтказилаётган шундай халқаро кинофестивалда иштирок этаётганим мен учун фахр ва шарафдир.
Руфат Гасанов, озарбайжонлик кино арбоб:
— Тошкент кинофестивали яна кино мухлисларини ўзига чорлади. Анчадан бери одамлар шундай нуфузли тадбирни жуда соғиниб қолган эди. Бу фестиваль қайта туғилганидан нафақат ўзбек халқи, кино ижодкорлари, балки хорижлик киночилар ҳам беҳад мамнундир. Ушбу фестиваль янгиланаётган Ўзбекистонда маданий-маърифий жабҳаларда ҳам ислоҳотлар ортга қайтмас, шиддатли, ҳам амалий тус олганини дунёга намойиш этмоқда.
Никита Михалков, режиссёр, киноактёр, “Оскар” мукофоти соҳиби:
— “Ипак йўли дурдонаси” Тошкент халқаро кинофестивали тиклангани жуда қувонарли ҳодиса. Вақтида бу фестиваль ўз даврининг ноёб ва ўзгача байрами эди. Ҳозир бу қадриятлар қайта тикланаётгани, ўзбек киносига янги руҳият ва куч бағишлаётганига ишонаман. Умид қиламанки, энди ҳар йили шу пайт сизлар билан Ўзбекистонда, халқаро кинофестивалда учрашамиз.
Эслатиб ўтамиз, кинофестиваль бош ҳомийси: AGMK, NGMK va “O‘zbekneftgaz”. Ҳамкор ҳомийлар: “O‘ZBEKTELEKOM”, “O‘zdonmahsulot” AK, “O‘zpromstroybank”ATB, “Ipoteka-bank” ATIB, “Asakabank”AJ, “O‘zbekiston temir yo‘llari”, “Hududgazta’minot”, “UzAuto Motors”AJ, “O‘zmetkombinat” AJ, “Milliy bank”AJ, “Farg’onaazot”AJ, “Eriell”, “Bosch” TM, “Easy Booking”.
Баҳринисо Мадумарова тайёрлади.