Айрим давлатлар сиёсий сабабларга кўра Украинага етарли миқдорда қурол сотмаяпти. Бу ҳақда Украина ташқи ишлар вазири Дмитрий Кулеба Politico нашрига берган интервьюсида маълум қилди.
Дипломат Киевда танклар ва ҳаво ҳужумига қарши мудофаа тизимларига катта эҳтиёж борлигини айтган. Унинг сўзларига кўра, жорий вазиятда қурол етказиб бериш масаласи янада долзарблашган.
“Биз бир фактни тан олишимиз керак: дунёда Украинага зарур нарсаларга эгалик қиладиган давлатлар бор, аммо улар сиёсий сабабларга кўра уни етарли миқдорда сотмаяпти”, – деган ТИВ раҳбари.
Вазирнинг фикрича, бу давлатларни кўндиришга кетадиган вақт ўрнига Украинанинг ўзи қурол ишлаб чиқаришни йўлга қўйиши керак.
Бундан олдин The New York Times газетаси НАТОнинг кичик давлатларида қурол захиралари тугагани тўғрисида хабар берганди.