Шавкат Мирзиёев “Hyundai”, “Kia” ва “Hyundai Rotem” раҳбарлари билан учрашди
“Kia” Ўзбекистонда янги русумдаги, электр ва гибрид автомобиллар ишлаб чиқаришни йўлга қўйиш, “Hyundai Rotem” Ўзбекистонга қўшимча юқори тезликдаги поездлар етказиб бериш имкониятларини ўрганмоқда.
Ўзбекистон Президентининг Сеул шаҳрига ташрифи доирасида “Hyundai Motor Group” стратегия бўйича президенти Ким Сон, “Kia Motors” катта вице-президенти Чо Сан Ун ҳамда “Hyundai Rotem” директорлар кенгаши раиси Ли Ён Бе билан музокаралар ўтказилди.
Учрашувда Кореянинг ушбу компаниялар гуруҳи Ўзбекистонда автомобилсозлик ва транспорт соҳаларини ривожлантиришга қўшаётган ҳиссаси юқори баҳоланди.
Жиззах вилоятида ташкил этилган автомобиль кластерида ишлаб чиқариш ҳажмини кенгайтириш, шунингдек, автомобиль бутловчи қисмларини маҳаллийлаштириш даражасини ошириш масалалари муҳокама қилинди.
“Kia” автомобилларини ишлаб чиқаришнинг тўлиқ занжири шакллантирилаётгани ва маҳсулот экспорти ортиб бораётгани қайд этилди. Музокараларда янги русумдаги автомобиллар ишлаб чиқаришни йўлга қўйиш, пресслаш цехини ишга тушириш, шунингдек, электр ва гибрид автомобиллар йиғишни ташкил этиш истиқболлари кўриб чиқилди.
Транспорт соҳасида эса “Hyundai Rotem” компанияси томонидан ишлаб чиқарилган юқори тезликдаги поездларнинг Тошкент – Хива йўналишида қатнови йўлга қўйилгани таъкидланди. Мазкур поездлар йўлда ҳаракатланиш вақтини икки баробарга қисқартиргани қайд этилиб, қўшимча поездларни етказиб бериш масаласи муҳокама қилинди.
Шунингдек, Ўзбекистонда “Hyundai Rotem” сервис марказини ташкил этиш, поезд ва бошқа транспорт воситалари учун бутловчи қисмлар ишлаб чиқаришни маҳаллийлаштириш ҳамда электр двигателлари учун магнитлар ишлаб чиқариш имкониятларини ўрганишга келишиб олинди.
Ушбу лойиҳалар Ўзбекистон автомобилсозлиги ва транспорт инфратузилмасида замонавий технологияларни жорий этиш, маҳаллий ишлаб чиқаришни кенгайтириш ва экспорт салоҳиятини оширишга хизмат қилади.
