Коррупцияга қарши курашиш агентлиги томонидан вилоят, туман ва шаҳар ҳокимликларида ҳужжатларнинг очиқлиги ҳолати ўрганилиб, 386 та ҳужжат асоссиз равишда “фақат расмий фойдаланиш учун” (DRU) белгиси билан махфийлаштирилгани аниқланди.
Маълум бўлишича, маҳаллий ҳокимият органлари томонидан маблағ ажратиш, кадрларни лавозимга тайинлаш ва бошқа муҳим бошқарув қарорлари ноқонуний равишда жамоатчиликдан яширилган. Амалдаги қонунчиликка кўра, мазкур ҳужжатлар очиқ эълон қилиниши лозим.
Агентлик томонидан «E-қарор» ахборот тизими мониторинги давомида жами 1 907 та махфий маъмурий қарор таҳлил қилиниб, уларнинг ҳар бештадан биттаси қонуний асосларсиз махфийлаштирилгани аниқланган.
Аниқланган ҳужжатлар қуйидаги йўналишларга тўғри келади:
- 156 та — лавозимларга тайинлаш бўйича;
- 68 та — ташкилий тузилмаларни тасдиқлаш ҳақида;
- 46 та — бюджет маблағларини тақсимлашга доир;
- 34 та — рағбатлантириш масалалари бўйича;
- 82 та — бошқа турдаги қарорлар.
Шаффофлик бўйича энг салбий ҳолат Фарғона вилоятида қайд этилиб, бу ерда қабул қилинган ҳужжатларнинг 44 фоизи яширилган. Шунингдек, Хоразм (39 фоиз), Бухоро (37 фоиз), Қашқадарё (26 фоиз) ва Самарқанд (15 фоиз) вилоятларида ҳам камчиликлар аниқланган.
Мазкур ҳолатлар юзасидан Агентлик томонидан Қорақалпоғистон Республикаси Вазирлар Кенгаши ва бир қатор вилоят ҳокимликларига 68 та ҳужжатни зудлик билан эълон қилиш, шунингдек, масъул мансабдор шахсларга нисбатан чоралар кўриш талаби билан расмий билдиришномалар юборилди.
Қолган ҳужжатлар ҳозирда ўрганилмоқда ва уларнинг ҳар бири бўйича қонуний қарорлар қабул қилиниши маълум қилинди.