Мўғулистонда Бош вазир истеъфога чиқарилди
Вазирнинг истеъфога чиқишига унинг ўғли сабаб бўлган.
Мўғулистон парламенти Бош вазир Лувсаннамсрайн Оюун-Эрденени истеъфога чиқарди. Ҳукуматга ишонч бўйича ўтказилган овоз бериш натижасида у 44 та овоз олди, бироқ лавозимни сақлаб қолиш учун камида 64 та овоз керак эди. Парламент таркибида жами 126 нафар депутат бор.
Бош вазирнинг истеъфосига унинг 23 ёшли ўғли Темуулен ва келини Угуумур сабаб бўлди. Май ойида Угуумурга тегишли Инстаграм саҳифасидаги суратлар бутун мамлакат бўйлаб тарқалди. Суратларда у 5 минг доллардан ортиқ турадиган либосда, 50 минг долларлик автомобиль бошқарувида, 5 минг долларлик сумка кўтариб, қимматбаҳо дўконлардан харид қилган пакетлар билан, ҳашаматли узук таққан ва вертолётда сайр қилаётган ҳолатда тасвирланган. Ҳозирда бу суратлар ўчириб ташланган.
Инфляция ортиб бораётган, аҳоли турмуш даражаси пасайиб бораётган бир пайтда бундай суратлар жамиятда катта норозиликка сабаб бўлди. Бу эса Улан-Батор марказидаги Сухе-Батор майдонида ва Ҳукумат саройи олдида норозилик намойишларига олиб келди. Намойишчиларнинг асосий шиори: “Истеъфо — бу оддий нарса” бўлди.
Норозилар Темууленнинг ҳеч қандай расмий даромад манбаи йўқлигини таъкидлаб, унинг дабдабали харажатларини Бош вазир молиялаштирган бўлиши мумкинлигини тахмин қилмоқда. Бу ҳолат нафақат Оюун-Эрдененинг “халқ ичидан чиққан инсон” деган имижига зид, балки ноқонуний бойлик орттирган бўлиши мумкинлиги ҳақида шубҳаларни кучайтирди.
Эслатиб ўтамиз, Оюун-Эрдене оддий оиладан чиққан ва бутун фаолияти давлат хизматлари ва партия ишлари билан боғлиқ. Унинг расмий маоши ўғли ва келини намойиш қилган даражадаги ҳашаматли ҳаётни таъминлаш учун етарли эмас.
