Наманганда 3 киши ис газидан заҳарланиб вафот этди
Улар ота-болалар бўлишган.
Ҳолат кеча, 18 ноябрь куни соат 7:30 ларда Поп тумани “Исковут” МФЙ Қўрғонтепа кўчасида содир бўлган. 1988 йилда туғилган А.Б. (эркак) вояга етмаган фарзандлари — 2014 йилда туғилган О.А. ҳамда 2010 йилда туғилган А.А. яшаш хонадонида иситиш учун ўрнатилган, қўлбола усулда тайёрланган печкага ёқилган табиий газдан чиққан ис газидан заҳарланиб, вафот этган.
Шунингдек, хонадонда бўлган эркакнинг турмуш ўртоғи Г.М. ис газидан заҳарланиб, оғир ҳолатда тиббиёт бирлашмасига олиб борилган. Шифокорлар томонидан кўрсатилган тиббий ёрдам натижасида аёлнинг ҳаёти сақлаб қолинган.
Ҳозирда мазкур ҳолат юзасидан туман прокуратураси томонидан терговга қадар текширув ҳаракатлари олиб борилмоқда.
