НАТО кучайишда давом этади — Столтенберг
Альянс бош котиби Европа хавфсизлиги учун янги реаллик пайдо бўлганини қайд этган.
НАТО ўз шарқий қанотини кучайтириш режаларини кўриб чиқмоқда. Бу ҳақда альянс бош котиби Йенс Столтенберг маълум қилди.
Унинг сўзларига кўра, ҳозирда Шимолий Атлантика блоки Украинадаги ҳарбий можаро фонида фундаментал ўзгаришлар даврида турибди. Столтенберг айни дамда НАТО шарқий қанотида 40 минг ҳарбий жойлаштирилганини таъкидлаган. Бу эса бундан бир неча ой олдингига нисбатан 10 баробарга кўп. Шунингдек, ушбу аскарлар сони доимий равишда ошириб борилиши айтилган.
“Биз ҳозир кўриб турган вазият — янги реаллик, Европа хавфсизлиги учун янги одатий ҳолат. Биз ҳарбий қўмондонларимиздан альянснинг янги реалликка мослашувига тайёрланишни сўрадик. Фикримча, НАТОга аъзо давлатлар етакчилари бу борада июнда бўлиб ўтадиган Мадрид саммитида бир қарорга келади”, — деган у.
Аввалроқ НАТО давлатлари Россия билан муносабатлар масаласида иккига ажралгани тўғрисида хабар берилганди.
