Непалда Молия вазири намойишчилар томонидан калтакланди
Катмандуда икки кун ижтимоий тармоқлар ва мессенжерларнинг блокланиши норозиликни кучайтирган.
Бугун, 9 сентябрь куни Непал Молия вазири Бишну Прасад Паудел Катманду кўчаларида намойишчилар ҳужумига учради. Интернетда тарқалган видеода вазир қочишга уринаётган пайтда, бир намойишчи уни тепиб юборади, натижада Паудел деворга урилиб йиқилади.
Норозилик намойишлари давомида собиқ бош вазир ва Конгресс партияси раҳбари Шер Баҳодур Деуба ҳамда унинг рафиқасига ҳужум қилинган, намойишчилар эса Президент қароргоҳи ҳудудига кириб борган.
Катмандуда икки кундан бери ижтимоий тармоқлар ва мессенжерлар блокланган, бу эса норозиликни янада кучайтирган. Намойишчилар давлат ишларида ошкоралик ва адолатни талаб қилмоқда.
Зўравонликлар натижасида 500 га яқин одам жароҳатланган. Ҳукумат парламент ва шаҳар марказидаги муҳим ҳудудларга комендантлик соати жорий қилган. Шу воқеаларга жавобан Непал ҳукумати таркибидаги Ички ишлар, Қишлоқ хўжалиги, Соғлиқни сақлаш ва Сув таъминоти вазирлари истеъфо берди. Бош вазир Шарма Оли партиялараро йиғилиш ўтказишини эълон қилган бўлсада, Катманду марказида янги тўқнашувлардан сўнг мамлакат Президенти Рамчандра Паудел Шарма Олини истеъфога чиқарди.
