Республика Тезкор штабининг маълум қилишича, 29 январь куни соат тахминан 16:15 ларда Нукус шаҳри “Темир йўл” маҳалласи 22 кичик туман 8/1-уйнинг 4-қаватида жойлашган хонадонларнинг бирида газ ва ҳаво аралашмасининг чақнаши туфайли портлаш содир бўлган.
Натижада, уйдаги бир нечта хонадонларнинг том ва пол қисмлари ўпирилиб, 4-қаватдан 1-қаватгача тушиб кетган.
Ҳодиса оқибатида 2 нафар фуқаро, яъни 2003 йилда туғилган С.Ш. ва 2004 йилда туғилган З.А., куйиш жароҳати олган ва зудлик билан Республика шошилинч тиббий ёрдам илмий маркази Қорақалпоғистон Республикаси филиалига ётқизилган.
Ушбу воқеа юзасидан Тезкор штаб тузилган ва унинг бошчилигида бахтсиз ҳодиса содир бўлган уйда қидирув-қутқарув ишлари олиб борилмоқда, шу жумладан ушбу уйда яшовчи фуқаролар ҳатловдан ўтказилиб, ўпирилган том ва пол қисмлари тагида фуқаролар бор-йўқлигига аниқлик киритиш бўйича чоралар кўрилмоқда.
Шунингдек, ушбу уйда яшаб келаётган қолган фуқаролар эвакуация қилиниб, вақтинчалик уй-жой ва уч маҳал иссиқ овқат билан таъминланди.
Ҳозирда терговга қадар текширув ҳаракатлари олиб борилмоқда.
Ҳодиса юзасидан ФВВ қўшимча маълумот берди. Унга кўра, бино конструкциялари орасидан қидирув-қутқарув ишлари олиб бориш жараёнида бир нафар фуқаронинг жасади топилди.
Айни вақтда бинонинг конструкцияларини тозалаш ишлари давом эттирилмоқда.
Воқеа юзасидан қўшимча маълумот тақдим этилади.