Ғарбий Соҳилда исроиллик кўчманчилар ҳужуми: 12 та автомобиль ёқиб юборилди
Босиб олинган Ғарбий Соҳилдаги бир нечта Фаластин қишлоғида содир бўлган ҳужумлар Исроилда ҳам сиёсий баҳсларга сабаб бўлди.

Исроиллик кўчманчилар 22 ноябрь, якшанба куни эрта тонгда босиб олинган Ғарбий Соҳилнинг Рамаллоҳ ва ал-Бира вилоятларидаги бир нечта Фаластин қишлоғига ҳужум қилди. Оқибатда 12 та автомобиль ёқиб юборилди, уйлар деворларига ирқчилик мазмунидаги ёзувлар туширилди. Бу ҳақда Фаластиннинг WAFA ахборот агентлиги хабар берди.
Ҳужумлар Кафр Малик, Дайр Абу Машъал ва Дайр ас-Судан қишлоқларида содир бўлган. Al Jazeera мухбири Нур Оденинг Кафр Маликдан хабар беришича, маҳаллий аҳоли тунги соат 02:00 атрофида ёнғин ва портлаш овозларидан уйғонган. Кейинроқ кўчманчилар автомобилларга ўт қўйгани маълум бўлган.
Фаластиннинг Девор ва аҳоли пунктларига қаршилик кўрсатиш комиссияси маълумотларига кўра, октабр ойида Фаластин ҳудудларида жами 3 133 та ҳужум қайд этилган. Шундан 1 764 таси Исроил кучлари, 1 369 таси эса исроиллик кўчманчилар томонидан содир этилган.
Ҳужумлар сони сентабр ойига нисбатан 53 фоизга ошган. Хусусан, кўчманчилар томонидан амалга оширилган ҳужумлар бир ой ичида 647 тадан 1 369 тага етиб, 112 фоизга кўпайган.
Исроилнинг Ғарбий Соҳилдаги ҳаракатлари мамлакат ичида ҳам танқидга учрамоқда. “Яшар” партияси етакчиси Гади Эйзенкот сўнгги ҳужумларни “яҳудий терроризми” деб атади. Унинг таъкидлашича, экстремистик гуруҳларнинг автомобиллар ва уйларга ўт қўйиши минтақавий барқарорликка таҳдид солади, инсонлар ҳаётини хавф остига қўяди ҳамда Исроилнинг миллий хавфсизлиги ва халқаро алоқаларига зарар етказади.
Эйзенкот, шунингдек, ўта ўнг қарашлари билан танилган вазирлар Итамар Бен-Гвир ва Безалел Смотрихнинг Ғарбий Соҳилдаги сиёсатини танқид қилиб, бу ҳудуд назоратсиз анархия ёқасига келиб қолганини билдирди.
Бен-Гвир эса айбловларни рад этди. У Эйзенкотни шошма-шошарлик билан хулоса чиқаришда айблаб, унинг баёнотини араб партиялари кўмагида ҳукумат тузишга тайёргарлик сифатида баҳолади.
Исроилнинг B'Tselem инсон ҳуқуқлари ташкилоти вакили Шаи Парнеснинг Al Jazeera’га айтишича, кўчманчилар кўпинча Исроил ҳарбийлари ҳамроҳлигида ҳаракатланади, бироқ ҳарбийлар ҳужум қилаётганларни тўхтатиш чораларини кўрмайди.
Исроил армияси эса ҳужум содир бўлган ҳудудларга полиция ходимлари ва криминалистик экспертларни юбораётганини маълум қилди. Улар давом этаётган тергов доирасида далилларни тўплайди.
Маълумот учун, 2023 йил октабридан буён босиб олинган Ғарбий Соҳилда Исроил кучлари ва кўчманчилар ҳужумлари оқибатида камида 1 222 нафар фаластинлик, жумладан, 255 нафар бола ҳалок бўлган.








