“Open Budget”га овоз бериш бошланди
Олтинкўл ва Улуғнор туманларида овоз бериш босқичи тўхтатилди.
“Ташаббусли бюджет”нинг 2025-йилги 2-мавсуми доирасида овоз бериш жараёни бошланди. Аммо Андижон вилоятининг Олтинкўл ва Улуғнор туманлари мазкур босқичдан четлатилди. Бу ҳақда Иқтисодиёт ва молия вазирлиги хабар берди.
Маълум қилинишича, жорий мавсум доирасида фуқаролардан жами 22 263 та лойиҳа қабул қилинган бўлиб, улардан 18 656 таси овоз бериш босқичига ўтказилган. Бироқ Андижон вилоятидаги ушбу икки туманда лойиҳаларнинг ишчи комиссиялар томонидан асоссиз рад этилгани бўйича фуқаролар ишонч рақамига шикоятлар келиб тушган.
Вазирлик мазкур шикоятлар юзасидан тегишли комиссияларга лойиҳаларни қонунчиликда белгиланган тартибда қайта кўриб чиқиш бўйича хатлар юборган. Шунга қарамай, лойиҳалар қайта кўриб чиқилмагани сабабли ушбу икки туманда овоз бериш босқичи бекор қилинди.
Фуқаролар бошқа ҳудудларда лойиҳаларга қуйидаги усуллар орқали овоз беришлари мумкин:
1. “Очиқ бюджет” портали: openbudget.uz
2. Порталнинг мобил иловаси: (Android ва iOS платформаларида мавжуд)
3. Telegram’даги расмий бот орқали.
Овоз бериш жараёнлари 31-август соат 23:59 гача давом этади. Шу билан бирга, 19-августдан 3 кун давомида саралашдан ўтган лойиҳалар бўйича тарғибот босқичи ўтказилгани ҳам эслаб ўтилди.
