Ўзбекистон Марказий Осиё давлатларининг дипломларини автоматик тан олиш ҳақидаги хабарларни рад этди
Ўзбекистон, Қозоғистон, Қирғизистон, Тожикистон ва Туркманистон ўртасида дипломларни ўзаро тан олиш бўйича халқаро шартнома мавжуд эмас.
Ўзбекистон Билим ва малака баҳолаш агентлиги Марказий Осиё давлатлари ўртасида олий таълим дипломларини автоматик равишда ўзаро тан олиш бўйича интернетда тарқалган маълумотлар ҳақиқатга мос келмаслигини маълум қилди. Агентликнинг таъкидлашича, дипломларни тан олиш тартиби ҳар бир давлатда алоҳида равишда миллий қонунчилик асосида амалга оширилади.
Расмий изоҳда қайд этилишича, Ўзбекистон ҳудудида хорижий давлатларда олинган таълим ҳужжатларини тан олиш жараёни “Таълим тўғрисида”ги Қонун ва ҳукумат тасдиқлаган “Хорижий таълим ҳужжатларини тан олиш тартиби тўғрисида”ги низом асосида амалга оширилади.
Агентликнинг маълум қилишича: “Ҳозирги вақтда Ўзбекистон, Қозоғистон, Қирғизистон, Тожикистон ва Туркманистон ўртасида дипломларни автоматик тан олишга доир халқаро шартнома мавжуд эмас. Ҳар бир давлатда хорижий дипломлар миллий қонунчиликда белгиланган талаблар асосида кўриб чиқилади”.
Мазкур изоҳ Қозоғистоннинг Zakon.kz портали 19 ноябрь куни Марказий Осиё давлатларининг ўзаро олий таълим дипломларини тан олиш бўйича келишувга эришгани ҳақидаги хабарлардан сўнг берилди. Порталдаги маълумотга кўра, Қозоғистон ҳукумати ушбу йўналишдаги халқаро келишув лойиҳасини маъқуллагани ҳақида қарор чиқарган.
Шу билан бирга, Самарқандда бўлиб ўтган ЮНEСКО Бош конференциясининг 43-сессиясида Ўзбекистон Олий таълим малакаларини тан олиш бўйича глобал конвенцияни ратификация қилгани эълон қилинган эди. Ушбу ҳужжат ЮНEСКОга аъзо давлатлар ўртасида дипломларни тан олиш жараёнини соддалаштиришга хизмат қилади, бироқ минтақавий автоматик тан олиш шартномасини англатмайди.
