Ўзбекистон Республикаси Қишлоқ хўжалиги вазирлиги ҳузуридаги Пахта селекцияси, уруғчилиги ва етиштириш агротехнологиялари илмий-тадқиқот институтининг “Ғўза биотехнологияси” лабораториясида рангли пахта етиштирилмоқда. Бу ҳақда “Янги Ўзбекистон” нашри хабар берди.
Маълум қилинишича, айни пайтда лаборатория тажриба майдонида олимлар томонидан молекуляр генетика, физиология, биокимё ҳамда селекциянинг замонавий услубларини қўллаган ҳолда юқори тола сифатига эга навларни яратиш устида илмий изланишлар олиб борилмоқда.
Таъкидланишиа, табиатда оппоқ пахтадан ташқари турли рангдаги ғўза экинлари ҳам мавжуд. Лаборатория ходимлари айнан ушбу ғўза навлари устида тадқиқотлар олиб бориб, толаси оч қўнғир, тўқ қўнғир, қизғиш, сарғиш, оч яшил, тўқ яшил ва бошқа рангдаги ғўза намуналарининг қимматли хўжалик белгилари сифатини оширишмоқда. Улар келгусида яна бошқа рангли ғўзалар устида ишлашни ҳам режалаштирган.