Ўзбекистонда сунъий интеллект технологияларидан фойдаланган ҳолда шахсий маълумотларни ноқонуний қайта ишлаш учун жавобгарлик белгиланди. Бу ҳақда Адлия вазирлиги матбуот хизмати хабар берди.
Янги тартибларга кўра, фуқароларнинг шахсий маълумотларини уларнинг розилигисиз интернет тармоғи, оммавий ахборот воситалари ёки телекоммуникация каналлари орқали қайта ишлаш ёки тарқатиш ҳолатларига йўл қўйган шахсларга нисбатан 20 миллион 600 минг сўмдан 41 миллион 200 минг сўмгача жарима қўлланилади. Шунингдек, ҳуқуқбузарлик содир этишда фойдаланилган техник воситалар мусодара қилинади.
Қонунда инсон ҳуқуқлари ва эркинликларига таъсир кўрсатувчи ҳуқуқий аҳамиятга эга қарорлар фақат сунъий интеллект тизимларининг хулосалари асосида қабул қилиниши мумкин эмаслиги қатъий белгиланди.
Мазкур нормалар шахсий маълумотларни ҳимоя қилиш ва сунъий интеллектдан масъулиятли фойдаланишни таъминлашга қаратилган.