Ўзбекистоннинг ҳавоси энг ифлос ҳудудлари эълон қилинди
Қайси вилоятда зарарли моддалар атмосферага энг кўп чиқарилаётгани ҳақида статистик маълумотлар эълон қилинди.
Экологларнинг хулосасига кўра, 2020 йилда Ўзбекистонда атмосферага жами 924 минг тонна миқдорида зарарли моддалар чиқарилган.
Экологик жиҳатдан энг кўп зарар кўрган вилоятлар рўйхатида дастлабки ўринларни Тошкент ва Қашқадарё эгаллади.
Ушбу ҳудудларда ҳавони ифлослантирувчи моддаларнинг 60 фоизи атмосферага чиқарилган. Экологик жиҳатдан энг тоза вилоятлар эса – Хоразм, Сурхандарё ва Жиззах ҳисобланади.
Маълумот учун: транспорт вазирлиги вакили Шербек Эрбеков 2030 йилгача атроф-муҳитни муҳофаза қилиш концепциясига атмосферани ифлослантирувчи моддаларни 10 фоизга камайтириш, жамоат транспортининг 80 фоизини газ билан тўлдирилган ёқилғи ва электромобилларга ўтказиш тизими киритилганини айтиб ўтганди.
Эслатиб ўтамиз, бундан аввал сўнгги 4 йилда шаҳарларда чанг-газ миқдори меъёрдан 4 баравар ошгани ҳақида хабар берилганди.
Чўлпоной Аҳмедова
