Париждаги дунёга машҳур Лувр музейида бугун эрталаб йирик талончилик ҳолати юз берди. Франция маданият вазири Рачида Дати берган маълумотга кўра, номаълум шахслар музей очилишидан олдин бинога босиб кирган ва Наполеон даврига оид қимматбаҳо заргaрлик буюмларини ўғирлаб кетган.
“Le Parisien” нашрининг ёзишича, жиноятчилар ҳозирда таъмирлаш ишлари олиб борилаётган Сена дарёси томонидаги фасаддан кириб, юк лифтидан фойдаланган ҳолда тўғридан-тўғри Аполлон галереясига етиб борган. Улар деразаларни синдириб, “Наполеон ва император заргaрлик коллекцияси”га кирувчи тўққизта буюмни олиб чиқиб кетган.
Воқеа жойига полиция ва терговчилар етиб келган. Музей хавфсизлик нуқтаи назаридан бутун кун давомида ёпилган. Ҳодиса оқибатида ҳеч ким жабрланмаган.
Маданият вазири воқеа жойига бориб, музей маъмурияти ҳамда ҳуқуқ-тартибот идоралари вакиллари билан учрашди. Ҳозирда тергов ҳаракатлари давом этмоқда, ўғирларни аниқлаш ва ўғирланган ашёларнинг қийматини баҳолаш ишлари олиб борилмоқда.