Польша Беларус ва Украина билан чегарадош ҳудудда парвозларни вақтинча чеклайди
Чекловлар хавфсизликни таъминлаш мақсадида 2025-йил 10-сентябрдан 9-декабргача амал қилади.
Польша авиация навигацияси хизмати (PANSA) хабарга кўра, мамлакат шарқида — Беларус ва Украина билан чегарадош ҳудудда парвозлар вақтинча чекланган. Қарор 2025-йил 10-сентябрдан кучга кириб, 9-декабргача амал қилади.
PANSA баёнотида айтилишича, чекловлар давлат хавфсизлигини таъминлаш мақсадида жорий қилинган. Ушбу ҳудудда фуқаролик дронлари куну тун парвоз қила олмайди. Тунда фақат ҳарбий самолётларга, кундузи эса Польша ҳукуматини олдиндан огоҳлантирган ҳаво кемаларига рухсат этилади. Фавқулодда вазиятлар, табиий офатлар ёки шошилинч тиббий ёрдам учун учадиган самолётлар бу тартибдан мустасно.
Шунингдек, ҳукумат ва тиббий авиация парвозлари, экологик хавф ёки табиий офат оқибатларини бартараф этишга қаратилган миссиялар ҳам рухсат этилиши мумкин. PANSA қайд этишича, белгиланган ҳудудга рухсатсиз кириш авиация қонунчилигини бузиш ҳисобланади.
Мазкур қарор Россия ва Беларуснинг қўшма “Запад-2025” ҳарбий машғулотлари фонида қабул қилинган. 10-сентябрь куни эса Россиянинг Украинага қилган дрон ҳужуми оқибатида илк бор Польша ҳудуди ҳам зарарланган, камида 19 дрон мамлакат ҳаво ҳудудига киргани ва улардан тўрт нафари уриб туширилгани хабар қилинганди. Шу сабабли Варшава, Люблин ва Жашув аэропортлари вақтинча фаолиятини тўхтатишга мажбур бўлди.
