Маълум қилинишича, эрталаб соат 06:20 ларда Қамчиқ довонининг 199 километрида Водий—Тошкент йўналишида ҳаракатланган "Spark" ҳайдовчиси бошқарувни йўқотиб, йўл ўртасидаги темир тўсиққа урилган. Унинг ортидан келаётган, "Gentra" автомобили "Spark"дан қочаман деб, "Cobalt" ва "Gentra"га ҳам урилган.

 

"Зудлик билан Қамчиқ МҚЁҚБ қутқарувчилари, тез тиббий ёрдам, ЙПХ, «Қамчиқавтойўл» Ихтисослашган йўллардан фойдаланиш унитар корхонаси ходимлари воқеа жойига етиб борган. Қутқарувчилар жароҳат олган фуқароларни автомошиналар ичидан чиқариб олган", — дейилади хабарда.

 

 

Қайд этилишича, "Spark" салонида ҳайдовчи ва бир нафар йўловчи бўлиб, йўловчи тан жароҳати олган. "Cobalt"нинг ҳайдовчиси ўнг қўл синиши ташхиси билан Ангрен шаҳар Марказий шифохонасига юборилган.

 

Ҳозирда шифокорлар уларнинг аҳволи яхшиланганини билдирган. Қолган автоуловдаги йўловчи ва ҳайдовчилар енгил тан жароҳати олгани сабаб уларга шу жойнинг ўзида биринчи тиббий ёрдам кўрсатилган.

 

 

Таъкидланишича, ушбу йўл-транспорт ҳодисаси автомобиль ҳайдовчилари ноқулай об-ҳаво шароитини инобатга олмай, тезликни ошириб ҳайдаши оқибатида юз берган.

 

Аввалроқ Бўстонлиқда 150 метр баландликдан "Spark" жарликка тушиб кетгани, Наманган вилояти Поп туманида "Nexia" йўл четидаги пастликка қулаши оқибатида йўловчи аёл вафот этгани, шунингдек, Водий—Тошкент йўналишида ҳаракатланган “Cobalt” автомобили ағдарилиб кетгани ҳамда Қамчиқ довонида "Nexia" йўловчиси пастликка тушиб кетгани ҳақида хабар берилганди.