Қашқадарёда эркак аттракциондан йиқилиб тушди
Ҳолат бўйича вилоят ИИБ маълумот берди.
Ижтимоий тармоқларда Қашқадарё вилоятининг Нишон туманида эркак истироҳат боғидаги аттракциондан тушиб кетгани акс этган видео тарқалди. Ҳолат юзасидан вилоят ИИБ ахборот хизмати хабар берди.
Ҳолат 8 май куни соат 19:30 ларда Нуристон шаҳарчасидаги истироҳат боғида юз берган. Нишон тумани “Нурчи” яшовчи фуқаро У.Н. ўртоқлари билан “Дракон” аттракционида учаётган вақтда рўпарасидаги ўриндиққа ўтиш учун жойидан турган ва эҳтиётсизлиги оқибатида йиқилиб тушган.
Оқибатда У.Н.нинг ўнг қўли синиб, Нишон туман марказий шифохонасига мурожаат қилган. Фуқаро шифохонада даво муолажалари олиб, уйига чиқиб кетган.
Ҳозирда ҳолат юзасидан Нишон туман ИИБ томонидан суриштирув ишлари олиб борилмоқда.
