Қашқадарёда раҳбар 400 минг долларга олинган зотли молларни сотиб юборди
Шунингдек, Бухорода МЧЖ раҳбари 2 млрд сўмлик кредит маблағларини талон-торож қилди
Бош прокуратураси ҳузуридаги Иқтисодий жиноятларга қарши курашиш департаменти томонидан кредит маблағлари эвазига харид қилинган чорва моллари ва жиҳозларни сотиб юборган МЧЖ раҳбарлари аниқланди. Жумладан, Департаментнинг Косон туман бўлими томонидан «Микрокредитбанк» АТБ Косон филиалининг мурожаатига асосан терговга қадар текширув ўтказилди.
Аниқланишича, «Р.З.» МЧЖ раҳбари Б.Р. банк филиалидан ажратилган 400 000 АҚШ доллари миқдоридаги кредит маблағлари эвазига хориждан олиб келинган 201 бош наслли чорва молларини бошқа шахсларга сотиб юборганлиги аниқланган.
Шунингдек, шу каби, Иқтисодий жиноятларга қарши курашиш департаменти томонидан ўтказилган терговга қадар текширувда «Ш.C.» МЧЖ масъул шахслари ҳудудий тижорат банки филиалидан ажратилган кредит маблағлари эвазига сотиб олинган 16 та инкубатор ва юк тарози жиҳозларининг 6 тасини бошқа бир фуқарога 112 000 АҚШ долларига сотиб юборгани аниқланган.
Бундан ташқари, департаментнинг Бухоро шаҳар бўлими томонидан ўтказилган терговга қадар текширувда МЧЖ раҳбари ва бошқалар тикувчилик фаолиятини ташкил этиш учун банк филиалидан ажратилган 2 млрд сўм имтиёзли кредит маблағини ўзи норасмий бошқариб келган бошқа бир МЧЖга ўтказиб, талон-торож қилишгани аниқланган.
Ҳозирда мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
