Қозоғистон Россия газининг Ўзбекистонга транзитини оширишга тайёр
Ўзбекистон ва «Газпром» ўртасида имзоланган шартномага кўра, 1 октябрдан кунига 9 млн кубометр табиий газ импорти бошланиши мўлжалланмоқда.
Қозоғистон энергетика вазири Алмасадам Саткалиев унинг мамлакати керак бўлса, Россия газининг Ўзбекистонга транзит ҳажмини оширишга тайёрлигини маълум қилди.
«Ҳозир биз 1,5 дан 10 млрд куб метр газ транзит ҳажмини индикатив тарзда муҳокама қилмоқдамиз. Шунингдек, Ўзбекистон энергетика тизимининг тайёрлигига, россиялик ҳамкасбларимизнинг газни экспорт қилишга тайёрлигига қараб транзитни кўпайтириш мумкин бўлади», — дейди у.
Аввалроқ Санкт-Петербург Халқаро иқтисодий форумида Россия газини Ўзбекистонга етказиб бериш бўйича шартнома ва республика газ узатиш тизимини Россия газини қабул қилишга тайёрлаш бўйича «Йўл харитаси» имзоланганди. Унга кўра, шартнома доирасида жорий йилнинг 1 октябрь санасидан кунига 9 миллион кубометр табиий газни Қозоғистон орқали импорт қилиш бошланиши мўлжалланмоқда. Шунга кўра, йиллик ҳажм қарийб 2 миллиард 800 миллион кубометрни ташкил этади.
Шунингдек, «ҚазақГаз» бошқаруви раиси Санжар Жаркешов Россия газини Қозоғистон ҳудуди орқали Ўзбекистонга ташиш бўйича «Марказий Осиё – Марказ» магистраль газ қувурининг Қозоғистон қисмидаги тайёргарлик ишлари тасдиқланган жадвалга мувофиқ тўлиқ ҳажмда амалга оширилаётганини маълум қилганди.
