Қозоғистонда президентлигига илк аёл номзод расман рўйхатга олинди
Бу ҳақда мамлакат Марказий сайлов комиссияси хабар берди.
Қозоғистон Республикаси Марказий сайлов комиссияси Қарақат Абденни 20 ноябрь куни бўлиб ўтадиган навбатдан ташқари президентлик сайловида номзод сифатида рўйхатга олиш тўғрисида қарор қабул қилди.
Марказий сайлов комиссиясининг кун тартибида фақат бир масала кўриб чиқилди.
«Марказий сайлов комиссиясининг 11 октябрдаги қарори билан номзоднинг қонун талабларига жавоб бериши аниқланди. Фуқаролар имзосини тўплаш учун номзодга имзо варақалари топширилди. Вилоят сайлов комиссияларининг баённомаларига кўра, Қозоғистон Республикаси Президентлигига номзодни қўллаб-қувватлаган мамлакатнинг 15 вилоятидан 121 314 нафар фуқаронинг имзоси тўпланган. Улардан 120 158 та имзо текширилиб, 118 418 таси ишончли деб топилди», — деди Марказий сайлов комиссияси аъзоси Шавкат Ўтемисов.
Шунингдек, МСК аъзолари номзоднинг номзодини қабул қилиш тўғрисидаги қарорга овоз беришди. Натижада, бир овоздан ижобий қарор қабул қилинди.
«Марказий сайлов комиссияси Қарақат Жақсилиқ қизи Абденни 2020 йил 20 ноябрга белгиланган навбатдан ташқари президентлик сайловида номзод сифатида рўйхатга олади», — деди Марказий сайлов комиссияси раиси Нурлан Абдиров.
Йиғилиш якунида МСК раиси номзодга номзодлик гувоҳномасини топширди.
