Наманганда 22 минг доллар пора олган қурилиш соҳаси ходимлари ушланди
Улар нотурар бинонинг лойиҳа ҳужжатларини ижобий ҳал қилиб бериш учун тадбиркордан пул талаб қилган.
Наманган вилоятида қурилиш соҳасига оид коррупсион ҳолат аниқланди. Бу ҳақда ДХХ хабар берди.
Маълум қилинишича, вилоят Қурилиш ва уй-жой коммунал хўжалиги бош бошқармасининг икки нафар бош мутахассиси маҳаллий тадбиркордан пора талаб қилган.
Улар Янги Наманган туманида жойлашган, тадбиркорга тегишли бўлган икки қаватли нотурар бино учун қурилиш рухсатномаси, архитектура-режалаштириш топшириғи ҳамда лойиҳа ҳужжатларини ижобий ҳал қилиб бериш эвазига 22 минг АҚШ доллари талаб қилган. Жорий йил март ойида эса ушбу маблағнинг 7 минг доллари олган.
Давлат хавфсизлик хизмати ходимлари томонидан Бош прокуратура ҳузуридаги Департамент билан ҳамкорликда ўтказилган тезкор тадбир давомида гумонланувчилардан бири қолган 15 минг АҚШ долларини олаётган вақтида ашёвий далиллар билан ушланди. Шунингдек, иккинчи шахс ҳам процессуал тартибда қўлга олинган.
Ҳозирда мазкур ҳолат юзасидан жиноят иши қўзғатилган бўлиб, тергов ҳаракатлари олиб борилмоқда.
