Қурғоқчиликдан кўрилган глобал зарар миқдори маълум қилинди
Мутахассисларнинг фикрича, Европа Иттифоқи мамлакатлари ҳозирда сўнгги 500 йилдаги энг кучли қурғоқчиликдан азият чекмоқда.
Январь-июнь ойларида сайёрамизнинг кўплаб мамлакатларида кузатилган қурғоқчилик камида 13,2 миллиард доллар глобал зарар етказган. Душанба куни Nikkei иқтисодий газетаси Aon суғурта компаниясига таяниб шундай маълумот келтирди.
Америка Қўшма Штатлари, Покистон ва Хитойнинг ғарбий қисмида ҳам глобал қурғоқчилик авж олган. Хитойда дарёларнинг саёзлашиши туфайли бир қатор гидроэлектр станцияларида электр энергияси ишлаб чиқариш деярли 40 фоизга камайди, деб ёзади газета. Шу сабабли Сичуан провинциясида, хусусан, Toyota Motor корпорациясининг йиғиш заводи фаолияти вақтинча тўхтатилди.
Июнь ойи бошида Япониянинг Атроф-муҳитни ўрганиш миллий институти ва Токио университети мутахассислари ҳисобот эълон қилиб, жорий асрнинг ўрталарига бориб ёзги қурғоқчилик кўплаб ҳудудлар, жумладан, Ўрта ер денгизи соҳиллари ва Жанубий Американинг кўплаб ҳудудлари учун норма бўлишини таъкидлаган эди.
