Россиянинг Владимир вилоятида Ўзбекистон фуқаросининг ўлими билан боғлиқ жиноят иши очилди. Вилоят Тергов қўмитаси маълумотига кўра, 54 ёшли эркакнинг жасади Петушинский туманидаги Старое Перепечино қишлоғида, хонадон ҳовлисидаги олма дарахти тагига кўмилган ҳолда аниқланган.
Текширув натижаларига кўра, марҳум ноябрь ойида 48 ёшли танишиникига борган. Спиртли ичимлик истеъмоли ортидан улар ўртасида келиб чиққан можаро туфайли аёл уни арқон билан бўғиб ўлдирган. Жиноят изларини яшириш мақсадида жасадни ҳовлига кўмиб қўйган. Шунингдек, гумонланувчи марҳумнинг телефони ва банк картасини ҳам ўғирлаб кетган.
«Зебра» телеканалининг хабар беришича, марҳум Россияда узоқ йиллар яшаб, Покровский темир-бетон заводида ишлаган. Дастлабки маълумотларга кўра, жанжал молиявий келишмовчилик туфайли келиб чиққан — марҳум танишидан қарзини ундириш учун борган, бироқ у қўшимча маблағ талаб қилган.
Воқеа жойидан ашёвий далиллар олинган. Гумонланувчи илгари наркотик моддалар билан боғлиқ жиноят учун судланганлиги аниқланган. Тергов органлари уни қамоққа олиш чораси кўрилишини сўрашга тайёрланмоқда. Ҳозирда суд-тиббий экспертиза ҳамда тергов ҳаракатлари давом этмоқда.